«

»

Paź 05 2011

Wydrukuj to Wpis

Gdzie te chopy?

NBC being window silly

W sobota łod rana wziełach sie za porzondki. Tepichy stoły już kole dźwierzy coby mój roztomiły chopek je wyklupoł. Wyszłach przed chaupa. Patrza, a somsiadka Trudka chowo sie za krzoki kole mojego pota. I robi takie rzecy coch łoczy szyroko łotwarła.
– Trudka! A co ty tam wynokwiosz?!
Trudka wejrzała na mnie i zaczła machać renkoma.
– Co ty chcesz? – spytałach sie kamratki wielce zadziwiono.
Trudka wyskocyła z krzoka i wparzyła do moigo antryja. Mało mie nie rozstrzaskała. Na szczyńście łoparłach sie ło tepichy i boło mientkie londowanie na dylinach. Jakoś żech sie pozbiyrała i wielce wnerwiono ruszyłach do Trudki.
– Ogupłaś! Cosik ci sie w twoi łepetynie poprzestawiało?!
– Może poprzestawiało, bo Zefel mie zdradzo!
Jezderkusie! Zefel? Toć to taki porzondny chop! Niemożebne!
– A skond ty ło tym wiysz? Pedzioł ci wto?
– Niy, ale pedzioł co idzie anglować, a poszoł w drugo strona. I tak świdrowoł, czy za nim nie ida no i wiysz kaj poszoł?
– Do chaupy łod Karlika
No to coś na rzecy jest. Karlik to mój somsiod z drugiej strony. Ale przeca Zefel nie zdradzo Trudki z Karlikiym wtory jest gdowcym. Cosik mi to nie pasuje.
– A kaj jest twój chopek? – pyto Trudka.
– Kajś poszoł, a mioł tepichy klupać
Stoły my w tym antryju i nogle moja kamratka wrzasła:
– Już wiym! Idziymy do chaupy Karlika i wejrzymy bez łokno. Może cosik uwidzymy?
– Blank na mózg ci padło. Momy kukać bez cudze okno?
– Nie cudze, jeno Karlikowe. Jak nic nie łoboczymy to sie wrócymy.
No nie wiym. Mom włazić z Trudkom do zogródka i podglądać somsiada? A jak Karlik nos oboczy i wezwie policyjo? Ale kamratce trza pomóc.
– Dobra. Idymy
Wlazły my do Karlikowego zogródka. Badyle tam takie co nos prawie nie było widać. Nogle łotwarły sie dźwierza i stanoł w nich Karlik. Za nim wyszoł mój chop i Zefel. Pitły my w krzoki, coby nos nie dojrzeli. Ale źle my wybrały. Jeszcze warciej my z tych krzoków wyskoczyły. Pokrziwy tak nos wyszczypały, co z wrzaskiym uciekły my na ulica. Gańba była jak diobli. Bo co my miały pedzieć jak pytali czamu wlazły my w karlikowe krzoki?… A chopy? Grali u somsiada w szkata.
Jak tera widza Karlika eli Zefla to niy wiym kaj mom sie podzioć z tyj gańby. Myśla, co swoim chopkom trza wierzyć. A Trudka niy mo letko, bo jak Zefel biere swoja angla to patrzy na swoja ślubno i pado:
– Ida do lipsty…

Permalink do tego artykułu: http://kopruch.blazejczak.eu/2011/10/gdzie-te-chopy/

  • Rodorek

    Witaj:) Dla mnie ten język to czysta egzotyka:) Daruję sobie nawet słownik, bo musiałabym praktycznie prawie każde słowo tłumaczyć, ale naprawdę fajnie się czyta:)
    Pozdrawiam serdecznie:)

    • Heniuśka

      Ważne , żeby spróbować zrozumieć .I dziękuję za taką desperacką próbę .