«

»

Lis 14 2011

Wydrukuj to Wpis

Ptoki na dachu, czyli ło gołymbiach

pigeons

Połosprawiom wom jak to jest, jak sie mo gołymbiorzy za somsiadów. Ludzie majom łostomajte myśli, smaki – no i hobby.

Kożdy z nos jest inkszy, ale gołymbiorze som blank inksze. Jo ich niy poradza do dzisioj kapnońć. Zaro z rana – jeszcze niy pośniodoł, jeszcze sie niy przeblyk, a zaroz we laciach do gołymbnika. Bo przeca gołymbie muszom mieć ziorka i świyżo woda. No i klapa ze szlagu trza łotworzyć, coby ptoki sie trocha pofurgały. To samo jest po połedniu. Łobiod na chopa po robocie na stole ceko – a łon ino na placu – prosto do gołymbi łobejrzeć – co i jak. I tak to leci kożdy dziyń, cołkiym normalnie. Ale tyn spokoj poradzi naroz kipnońć, jak przidom we maju piyrsze flugi. Cołki tydziyń w gołymbniku i na placu stojom i nojlepsze gołymbie na flugi wybiyrajom. Nojlepij sadzić gołymbice, co majom prawie gniozda. Jak wszystko już fest stoji, to jadom z gołymbiami we kadubku do „Punktu Zbiorczego”. Tam kożdy gołomb dostanie gummiring na jedna szłapa i numer na jakiś liście. Na koniec trza jesce zapłacić i dopiyro potym dostanie sie to najważniejsze „sthur”. Jedyn zygor na piyńć chopa.

Niedziela rano – sześć na zygarze, cołko wieś jeszcze śpi – ino gołymbiorze już po placu lotajom i niebo we wszystkie strony łoglondajom. A przecie dobrze wiedzom, co gołymbie do dom ło trzeci przilecom. Dopiyro teraz kożdy wiy, czamu kożdy gołymbiorz mo krziwy kark, wytarty kragel i zmaraszone szczewiki. Bo patrzi ino na wiyrch. Na kożdym placu stoi łod rana narychtowane koło, abo moplik, abo we pocie som sztachyty wybite. A wszystko po to, coby jak nojdrapci z tym gumowym ringem sie do zygara dociść. Ale niy tak, jak Zefel łońskiego roku – gummiring we gymbie, po bosoku na kole niy doł pozor i w rancie wylondowoł – a ring we brzuchu. Coby tyn sztres przeczimać majom gołymbiorze kista piwa na placu i pora kamratów po fachu. Dysputujom i mondrujom sie, wszystko lepi wiedzom. Ziga godo, co jego karpiok na pewno za piyrszego przidzie, a siwek łod Zefla i Fal łod Helmuta przinajmnij godzina za Karpiokym bydom. Zanim piyrszy gołomb na szlagu siednie, to kista piwa poleku jest próżno. Gołymbiorze to tak juz majom – piwo pijom z uciechy.

A cołki tyn cyrkus, jak dobrze pódzie skońcy sie nowym dyplomym wtory w antryju przibydzie.

Permalink do tego artykułu: http://kopruch.blazejczak.eu/2011/11/ptoki-na-dachu-czyli-lo-golymbiach/

  • Gołymbiorze tak zawdy mieli co przajali na furgajonce ptoszki spozierać.A mało kista piwa nie jest zło.Tak se rozmyślom czy na swoje baby tyż tak oczekujom? Bo zdo mie sie, że ni.. A przeca łone tyż ring majom ino ich na liście ni ma.Pozdrowiom .

  • Dorota

    Jo nojbażi na świecie nie cierpia kopruchów i muchow ale tyn jakoś mi sie spodoboł Musz Ci pedzieć że jakio baba łod gołymbiorza to jus swoje wim doszło do tego że i jo we te nibo zaglondom a jak pucuja te puchary ze kurzu to sie bardzo raduja ale tego mu nie pokoza.bo by sie za bardzo myśloł .No akopruch jest tys fajny. Dorka

  • Hallo
    No takie kopruchy do sie wytrzymac ,bo te inne to gryzom pierniki.
    Jak sie mo slotko krew to dopiero. Przeproszom za te moje literki
    alle jo mom inno tastatura.

    Narazie – trzymejcie sie kopruchy

    Ursula z Bochum-BRD